April 13, 2011

ವಿಷುವಿನ ಶುಭಾಶಯಗಳು.


ವಿಷುವಿನ ಶುಭಾಶಯಗಳು.

ಇಂದು ವಿಷು. ಕೇರಳ ಹಾಗೂ ಅವಿಭಜಿತ ದಕ್ಷಿಣ ಕನ್ನಡದ ಹಲವರಿಗೆ ಇದು ದೊಡ್ಡ ಹಬ್ಬ. ಹೊಸ ವರುಷದ ಆರಂಭ.

ಮನೆಯ ಯಜಮಾನ ದೇವರ ಮುಂದೆ ನೂತನ ಫಲ ವಸ್ತು, ಬೆಳ್ಳಿ, ಬಂಗಾರ, ಹಣ ಎಲ್ಲವನ್ನೂ ಇಡುತ್ತಾನೆ. ಇದಕ್ಕೆ ’ವಿಷು ಕಣಿ’ ಎಂದು ಹೇಳುತ್ತಾರೆ.

ಮನೆಯ ಸದಸ್ಯರೆಲ್ಲರೂ ಬೆಳಿಗ್ಗೆ ಎದ್ದು ಮೊದಲು ’ಕಣಿ’ ನೋಡಿಯೇ ಮುಂದಿನ ಕೆಲಸಗಳತ್ತ ಸಾಗುತ್ತಾರೆ. ಹಿರಿಯರ ಕಾಲಿಗೆ ನಮಸ್ಕರಿಸಿ ಆಶೀರ್ವಾದ ಪಡೆಯಲಾಗುತ್ತದೆ. ಹೊಸ ಬಟ್ಟೆ ತೊಡುವುದೇ ಸಂಭ್ರಮ. ಯಾವ ಹಬ್ಬಕ್ಕೂ ಹೊಸ ಬಟ್ಟೆ ಖರೀದಿಸದಿದ್ದರೂ ವಿಷುವಿಗೆ ಹೊಸ ಬಟ್ಟೆ ಖಂಡಿತಾ.
ಅಂದೇ ಮನೆಯ ಕೆಲಸಗಾರರಿಗೂ ಕರೆದು ಹೊಸ ಬಟ್ಟೆ ಇತ್ತು ಪಾಯಸದ ಔತಣ ಬಡಿಸಲಾಗುತ್ತದೆ. ಹಿಂದಿನ ಕಾಲದಲ್ಲಿ ಗೇಣಿ ಅಥವಾ ಒಕ್ಕಲು ಮಕ್ಕಳು ಒಡೆಯನ ಮನೆಗೆ ಹಣ್ಣು, ಹೊಸ ಫಲಗಳನ್ನು ನೀಡುವ ವಾಡಿಕೆಯೂ ಇತ್ತಂತೆ.
ಗೇರು ಬೀಜ ಬಿಡುವ ಕಾಲ ಇದಾದ್ದರಿಂದ ಎಳೇ ಗೇರುಬೀಜ (ಚೋರೆ)ದ ಪಾಯಸ, ವಡೆ ಇತ್ಯಾದಿಗಳ ಭರ್ಜರಿ ಊಟ ಅಂದು ನಡೆಯುತ್ತದೆ.

ಮಕ್ಕಳಿಗೆ ಹೊಸ ಬಟ್ಟೆ, ಹಿರಿಯರಿಂದ ಪಾವತಿಯಾದ ಹಣದ ಮೊತ್ತ ಇವುಗಳ ಕಡೆಯೇ ಗಮನ.
ಹರೆಯದ ಹುಡುಗರಿಗೆ ಹಿರಿಯರಿಂದ ಧಮಕಿ - ಕಾಲಿಗೆ ನಮಸ್ಕರಿಸಿದರೆ ಮಾತ್ರ ದುಡ್ಡು ಕೊಡುವೆ, ಇಲ್ಲವಾದಲ್ಲಿ ಇಲ್ಲ !!!!

ಸುಂದರ ನೆನಪುಗಳು. ಪ್ರತೀ ವಿಷುವಿಗೂ ಒಂದೊಂದು ನೆನಪುಗಳು. ಸೌರ ಯುಗಾದಿ - ವಿಷುವಿನ ಶುಭಾಷಯಗಳು. ಹೊಸ ವರುಷ ಹರುಷ ತರಲಿ.

1 comment:

  1. nanu idara bagge keliye iralilla.. parichayisidiri.. dhanyavaada..

    ReplyDelete