December 30, 2010

ಜಾಗೋ ಗ್ರಾಹಕ್ ಜಾಗೋ

ಹೇಳಿರುವ ಬೆಲೆ ೧೭, ಆದರೆ ನಾವು ಕೊಡುವ ಬೆಲೆ ೩೫ !!!!
ಆಶ್ಚರ್ಯ ಆಗುತ್ತಿದೆ ಅಲ್ಲವೇ.. ಹೌದು ಇದೇ ನಡೆಯುತ್ತಿದೆ ಇಂದಿನ ಕೆಲವು 'ಮಾಲ್'ಗಳಲ್ಲಿ.
ನಿನ್ನೆ ಬೆಂಗಳೂರಿನ ಬಡಾವಣೆಯಲ್ಲಿನ ಆಹಾರ ಮಳಿಗೆಯೊಂದಕ್ಕೆ ಭೇಟಿ ನೀಡಿದ್ದೆ. ಹಣ್ಣು ತರಕಾರಿಗಳ ಬೆಲೆ ಹೆಚ್ಚಾದ ನಿಟ್ಟಿನಲ್ಲಿ ಬೆಲೆ ಕಡಿಮೆ,  ಒಳ್ಳೆಯ ಮಾಲು ಇರುವಲ್ಲಿಗೆ ನಾವು ಹೋಗುವುದು ಸಹಜ. ಹಾಗೇ ಅಲ್ಲಿ ಗ್ರಾಹಕರಿಗೆ ಬೆಲೆಪಟ್ಟಿಯಲ್ಲಿ ನಮೂದಾಗಿದ್ದ ಬೆಲೆಯ ಆಧಾರದಲ್ಲಿ ಒಂದಷ್ಟು ಕೊಂಡಿದ್ದೆ. ಮಾರಾಟಗಾರ್ತಿ ’ಬಿಲ್’ ಮಾಡಿ ಕೈಗಿತ್ತಾಗ ಒಂದಕ್ಕೆರಡು ಬೆಲೆಗಳನ್ನು ಹಾಕಲಾಗಿತ್ತು. ಕೊನೆಗೂ ನಮೂದಾಗಿದ್ದ ಬೆಲೆಗೆ ಪಡೆದುಕೊಳ್ಳುವಲ್ಲಿ ಸಫಲಳಾಗಿದ್ದೆ.

ಆದರೆ, ನಿನ್ನೆ ಇದ್ದಿದ್ದು ಕೆಲವೇ ವಿಧಗಳು, ಹೆಚ್ಚು ಗ್ರಾಹಕರಿರಲ್ಲಿಲ್ಲವಾಗಿ ತಾಳೆ ನೋಡಲು ಸಾಧ್ಯವಾಯಿತು. ತಿಂಗಳ ಸಾಮಾಗ್ರಿಗಳನ್ನು ತರುವಾಗ ಪ್ರತಿಯೊಂದನ್ನೂ ನಮೂದಾದ ಬೆಲೆಯನ್ನು ನೆನಪಿರಿಸಿಕೊಳ್ಳುವುದು ಸಾಧ್ಯವಿಲ್ಲ. ನಾವು ಎಚ್ಚೆತ್ತು ಕೊಳ್ಳಲೇ ಬೇಕು. ದರಗಳಂತೂ ದಿನ ದಿನವೂ ಹೆಚ್ಚುತ್ತಲೇ ಇದೆ. ಅದರೊಂದಿಗೆ ಈ ರೀತಿ ಮೋಸ ಹೋಗುತ್ತಿರುತ್ತೇವೆ.

ಇದೇ ಸಂಧರ್ಭದಲ್ಲಿ ಆಟೋ ಚಾಲಕರ ಆಟಾಟೋಪಗಳನ್ನೂ ಹೇಳಬೇಕೆನ್ನಿಸುತ್ತದೆ. ಇದು ಎಲ್ಲಾ ಅಟೋ ಚಾಲಕರಿಗೆ ಸಂಭಂದಿಸಿದ್ದಲ್ಲ, ಅದರೂ ನನಗೆ ೮೫% ಸಲ ಆದ ಅನುಭವ: ೧೭ರೂ. ಆದರೆ, ಚಿಲ್ಲರೆ ಇದ್ದರೂ ಇಲ್ಲ ಎಂಬ ಸಬೂಬು, ೨೦ ರೂ. ಗುಳುಂ !!! ಯಾವುದೇ ಅಂಗಡಿಗಳಿಗೆ ಹೋದಾಗ ಚಿಲ್ಲರೆ ಇಲ್ಲದೇ ನಾವು ಅಂಗಡಿಯಾತನಿಗೆ ಚಿಲ್ಲರೆ ಬಿಟ್ಟು ಬಂದಿಲ್ಲ.
ಟಿ.ವಿ ಯಲ್ಲಿ ಒಂದು ದಿನ ಒಬ್ಬ ಆಟೋ ಚಾಲಕ ಹೇಳುತ್ತಿದ್ದ, "ಆಟೋದಲ್ಲಿ ಬರುವ ಕೆಲವರು ೧೭ರೂ ಆದಾಗ ೨೦ ರೂ ಕೊಡುತ್ತಾರೆ (ಇಲ್ಲ ತೆಗೆದುಕೊಳ್ಳುತ್ತಾರೆ) ಅದರಲ್ಲಿ ೧ ರೂ ಬಡವನಿಗೆ ಕೊಡುತ್ತೇನೆ .... etc. etc.. ಎಂದೆಲ್ಲ ಹೇಳುವುದು ಕೇಳಿಸಿತು. ಆದರೆ ಇದು ಯಾವ ನ್ಯಾಯ ಎಂದನಿಸಿದ್ದು ಸುಳ್ಳಲ್ಲ.
ಅಡುಗೆ ಅನಿಲ ವಿತರಕ ಮನೆಗೆ ಬರುತ್ತಾನೆ - ೩೬೦ ರೂ. ಗಳ ಬದಲು ೩೮೦ ರೂ. ಪಡೆಯುತ್ತಾನೆ...
ಪಟ್ಟಿ ಮಾಡಿದರೆ ಇನ್ನೂ ಒಂದಷ್ಟಿದೆ !!!
ಹೀಗೆ ನೀವೂ ಇದನ್ನೆಲ್ಲಾ ನೋಡಿರಬಹುದು..
ಎಂದು ನಾವು ಎಚ್ಚೆತ್ತುಕೊಳ್ಳುವೆವು?
೨೦೧೧ರ ಹೊಸ್ತಿಲಲ್ಲಿ ನಿಂತು ಹಿಂತಿರುಗಿ ನೋಡಿದಾಗ ನನಗನಿಸಿದ್ದನ್ನು ನಿಮ್ಮ ಮುಂದಿರಿಸಿರುವೆ. ಹೇಗನ್ನಿಸಿತು - ತಿಳಿಸಿ.

ಹರುಷದ ಹೊಸವರುಷ ನಿಮ್ಮದಾಗಲಿ

December 25, 2010

ಹನಿ - ೩

ಹನಿಯೊಂದು ನನ್ನ ಬಳಿ ಇದೆ
ಅದರ ಬೆಲೆಯ ನಾ ಅರಿಯೆನು
ಕೇಳು ಬಾಯಾರಿದ ಪ್ರಥಿಕನ ಕೇಳು
ಆ ಒಂದು ಹನಿಗಿರಿವ ಬೆಲೆ ಏನೆಂದು

December 22, 2010

ಚಳಿಯಲ್ಲೊಂದು ಬೆಚ್ಚಗಿನ ನೆನಪು


ಪ್ರತಿಯೊದು ಕಾಲಕ್ಕೂ ಅದರದೇ ಆದ ಸೌಂದರ್ಯವಿದೆ. ಕಾಲ ಬದಲಾಗುತ್ತಿಲ್ಲದಿದ್ದರೆ ಬದುಕು ನಿಂತ ನೀರಾಗುತ್ತಿತ್ತು. ಪ್ರಕೄತಿಯ ಮನೋಹರ ರೂಪಗಳನ್ನು ಅನುಭವಿಸಲು ಬಹಳ ಸುಂದರ. ಪ್ರತಿ ವರುಷವೂ ಹರುಷ. ಪ್ರಕೄತಿ ಒಂದು ಅದ್ಭುತ. ನಾನು ಸ್ವಭಾವತಃ ಪ್ರಕೄತಿ ಪ್ರಿಯಳು. ಅವಳ ಪ್ರತಿಯೊಂದು ಭಾವನೆಗಳು ಉಲ್ಲಾಸ ತರುತ್ತದೆ, ಹೊಸ ಸ್ಪೂರ್ತಿಯನ್ನು ನೀಡುತ್ತದೆ.

ಈ ಚಳಿಗಾಲದ ರಮ್ಯತೆಯನ್ನು ನಾನು ಇದೀಗ ೮-೯ ವರ್ಷಗಳಿಂದ ಅನುಭವಿಸುತ್ತಿರುವೆ.ನನ್ನೂರಲ್ಲಿ ಇದ್ದಿದ್ದು ಕೇವಲ ೨ ಕಾಲಗಳು. ಚಳಿಗಾಲವನ್ನು ಯಾವತ್ತೂ ಅನುಭವಿಸಿರಲಿಲ್ಲ. ೨ ನೇ ತರಗತಿಯಲ್ಲಿದ್ದಾಗ ಕಲಿತಿದ್ದ ವರ್ಷಕ್ಕೆ ೩ ಕಾಲಗಳಲ್ಲಿ ಮಾತ್ರ ಚಳಿ ಜೀವಂತವಾಗಿರುತ್ತಿತ್ತು. ಹಾಂ.... ಮತ್ತೆ ಇನ್ನೊಂದು ಹಾಡಿತ್ತು..
ಚಳಿರಪ್ಪೊ ಚಳಿರೊ...
ಚಳಿರಮ್ಮ ಚಳಿರೊ....
ಅಮ್ಮನ ಸೀರೆ ಹೊದ್ಕೊಂಡೆ ಚಳಿ ಹೋಗ್ಲೇ ಇಲ್ಲ..
ಅಪ್ಪನ ಕೋಟು ಹಾಕ್ಕೊಂಡೆ ಚಳಿ ಹೋಗ್ಲೇ ಇಲ್ಲ..
ಅಕ್ಕನ ಶಾಲು  ಹೊದ್ಕೊಂಡೆ ಚಳಿ ಹೋಗ್ಲೇ ಇಲ್ಲ..

ಇದು ಚಳಿಯ ಕಲ್ಪನೆಯನ್ನು ಕಟ್ಟಿ ಕೊಟ್ಟಿತ್ತು.
ನನ್ನ ಕಕ್ಕಿಯರ ಮನೆ ಚಳಿಯ ನಾಡಲ್ಲಿ ಇದ್ದುದ್ದರಿಂದ, ಚಳಿಗಾಲದಲ್ಲಿ ಅಲ್ಲೊಮ್ಮೆ ಹೋಗಿದ್ದಾಗ ಅನುಭವಿಸಿದ್ದೆ.

ಚಳಿ ಎಂದಾಕ್ಷಣ ನನಗೆ ನೆನಪಾಗುವುದು ನನ್ನ ಓದಿನ ದಿನಗಳು. ಚಳಿಯ ಊರಿಗೆ ಹೋಗಿ ಸಿಕ್ಕಿಬಿದ್ದಿದ್ದೆ. ದುರಾದೄಷ್ಟಕ್ಕೆ ನನ್ನ ಪರೀಕ್ಷಾ ಕಾಲವೂ ಡಿಸೆಂಬರ್ ತಿಂಗಳುಗಳೇ ಆಗಿತ್ತು.ಬೆಚ್ಚಗೆ ಹೊದ್ದು ಮಲಗೋಣವೆಂದರೆ ಪುಸ್ತಕಗಳ ಕಾಟ. ಓದೋಣವೆಂದರೆ ಚಳಿರಾಯ ಮಲಗಲು ಒತ್ತಾಯಿಸುತ್ತಿದ್ದ.ಅಂತೂ ಪರೀಕ್ಷೆ ಮುಗಿಸಿದಾಗ ಗೆದ್ದ ಭಾವನೆ.ನನ್ನ ’ರೂಮಿ’ ಚಳಿಯ ನಾಡಿನಿಂದಲೇ ಬಂದವಳಾಗಿದ್ದಳು. ಆದ್ದರಿಂದ ಅವಳ ಓದಿಗೆ ಭಂಗ ತರುವವರಾರೂ ಇರುತ್ತಿರಲಿಲ್ಲ.ನನಗೋ ಅವಳ ಓದು ಕಂಡರೆ ಹೊಟ್ಟೆ ಉರಿಯುತ್ತಿತ್ತು. ನಾನೋ ಓದುವೆನೆಂದು ಪುಸ್ತಕ ಹಿಡಿದು ಕುರ್ಚಿಯಲ್ಲಿ ಕೂರುತ್ತಿದ್ದೆ. ನಂತರ ನೆಲಕ್ಕೆ ಸವಾರಿ ಹೋಗುತ್ತಿತ್ತು, ಅನಂತರದಲ್ಲಿ ಪುಸ್ತಕದ ಮೇಲೆಯೇ ನಿದ್ದೆ ಹೋಗುತ್ತಿದ್ದೆ... ಹಾ.. ಹಾ... ಹಾ...
ಬೆಳಗ್ಗೆ ನನ್ನ ’ರೂಮಿ’ ಎದ್ದು ’coffee’ ಮಾಡಿ ಕೊಡುತ್ತಿದ್ದಳು. ವಾಹ್...ನಿಜಕ್ಕೂ ನಾನು ಅದೄಷ್ಟ ಮಾಡಿದ್ದೆ.

ಬೆಂಗಳೂರಿನಲ್ಲಿ ಚಳಿಯ ಸರಿಯಾದ ಅನುಭವ ಪಡೆಯುತ್ತಿದ್ದೇನೆ. ಚಳಿಗಾಲ ಬಂದಾಕ್ಷಣ ಬೆಚ್ಚಗಿನ ಬಟ್ಟೆಗಳು, ಕ್ರೀಮುಗಳು ಎಲ್ಲಾ ಹೊರಬರುತ್ತದೆ. ಕತ್ತಲೂ ಬೇಗ ಹಾಗೆಯೇ ಬೆಳಗೂ ನಿಧಾನ. ಏನೇ ಆದರೂ ಚಳಿಗಾಲದ ಈ ಸೋಮಾರಿತನ  ಬಲು ಪ್ರಿಯವಾದುದು.
ನಿಮ್ಮಲ್ಲೂ ಚಳಿಗಾಲದ ಬೆಚ್ಚಗಿನ ನೆನಪುಗಳಿರಬಹುದು. ನನ್ನೊಡನೆ ಹಂಚಿಕೊಳ್ಳುವಿರಾ.........

December 13, 2010

ಸ್ತ್ರೀ ಎಂದರೆ ಇಷ್ಟೇ ಸಾಕೇ ?!

ಮನದ ತುಂಬಾ ಮುಗ್ಧತೆಯಿತ್ತು
ಕಣ್ಣ ತುಂಬಾ ಅಚ್ಚರಿಯಿತ್ತು
ಬಾಯ ತುಂಬಾ ಮುಗುಳು ನಗುವಿತ್ತು’
ತಲೆ ತುಂಬಾ ಆಟದ ಗುಂಗಿತ್ತು
ಆಗ ನನ್ನ ಬಳಿ ಬಾಲ್ಯವಿತ್ತು

ಹೃದಯದ ತುಂಬಾ ಪ್ರೀತಿಯಿತ್ತು
ಮನದ ತುಂಬಾ ಸುಂದರ ನೆನಪಿತ್ತು
ಕಣ್ಣ ತುಂಬಾ ಚಂಚಲತೆಯಿತ್ತು
ತನು ತುಂಬಾ ಸುಂದರತೆ ಇತ್ತು
ಆಗ ನನ್ನ ಬಳಿ ಅವನ ಇರವಿತ್ತು

ಕೈಯಲ್ಲೊಂದು ಶಿಶುವಿತ್ತು
ಎದೆ ತುಂಬಾ ಹಾಲಿತ್ತು
ಮನ ತುಂಬಾ ನೆಮ್ಮದಿಯಿತ್ತು
ಮನೆ ತುಂಬಾ ಸಂಭ್ರಮವಿತ್ತು
ಆಗ ನನ್ನ ಬಳಿ ಮಗುವೊಂದಿತ್ತು

ತಲೆ ತುಂಬಾ ಬೆಳ್ಳಿ ಕೂದಲಿದೆ
ಮನ ತುಂಬಾ ಬೇಗೆಯಿದೆ
ಎದೆ ತುಂಬಾ ನಿಟ್ಟುಸಿರಿದೆ
ಒಂಟಿತನ ಸಂಗಾತಿಯಾಗಿದೆ
ನನ್ನ ಬಳಿಯೀಗ ವೃದ್ಧಾಪ್ಯವಿದೆ

December 07, 2010

ಶಕುನ

"ಸೆಲ್ಯೂಟ್ ಕುಪ್ಪುಳು" ಇದು ಎಲ್ಲಿಯೇ ಯಾವುದೇ ಕುಪ್ಪುಳು ಅಂದರೆ ಕೆಂಭೂತ ಕಂಡಾಗ ನನ್ನ ಮನದಲ್ಲಿ ನೆನಪಾಗುವ ಶಬ್ಧಗಳು. ಸಣ್ಣವಳಿದ್ದಾಗ ಗೆಳತಿಯೊಬ್ಬಳು ಹೇಳಿದ ನೆನಪು... ಕೆಂಭೂತ ಕಂಡಾಗ ಹೇಳಿದರೆ ಆ ದಿನ ಶುಭದಿನ, ಲಾಭದ ದಿನ ಎಂದು.
        ಇದೇ ರೀತಿ ದಿನದಲ್ಲಿ ಹಲವು ಶಕುನಗಳನ್ನು ನಂಬುತ್ತಲೇ ಇರುತ್ತೇವೆ. ಬಲದ ಕಣ್ಣು ಅದುರಿದರೆ  ಆ ದಿನ ಗಂಡು ಮಕ್ಕಳಿಗೆ ಶುಭ, ಹೆಣ್ಣು ಮಕ್ಕಳಿಗೆ ಅಶುಭ. ಹಾಗೆಯೇ ಎಡದ ಕಣ್ಣು ಹೆಣ್ಣು ಮಕ್ಕಳಿಗೆ ಶುಭ, ಗಂಡು ಮಕ್ಕಳಿಗೆ ಅಶುಭ. ಅಂಗೈ ತುರಿಸಿದರೆ ಯಾವುದೋ ಲಾಭದ ಮುನ್ಸೂಚನೆ.ಬೆಕ್ಕು ಅಡ್ದ ಬಂದರೆ ಅಶುಭ. ೧೩ ಸಂಖ್ಯೆ ಅಶುಭ. ತುಂಬಾ ನಕ್ಕ ದಿನ ಅಳು ನಿಶ್ಚಿತ (ತೀರಾ ಇತ್ತೀಚಿನವರೆಗೂ ಇದನ್ನು ನಂಬುತ್ತಿದ್ದೆ !!!). ಕಾಗೆ ಬೆಳಗಿನ ಹೊತ್ತು ಮನೆ ಎದುರಿನ ಮರದಲ್ಲಿ ಕುಳಿತು ಕೂಗಿದರೆ ಆ ದಿನ ನೆಂಟರ ಆಗಮನ. (ಕಾಂಕ್ರೀಟು ಕಾಡಿನಲ್ಲಿ ಮನೆ ಎದುರಿನ ಮರ ದುರ್ಲಭ :-) ).

             ಆದರೆ, ಈ ಶಕುನಗಳೆಂಬುದು ನಿಜವಾಗಿಯೂ ಸತ್ಯವೇ? ಇಲ್ಲಾ ಮನುಷ್ಯನ ಮನಸ್ಸಿನ ದೌರ್ಬಲ್ಯವೇ???
ನನ್ನ ಪ್ರಕಾರ ಇದು ದುರ್ಬಲ ಮನಸ್ಸಿನ ಹೊಂದಾಣಿಕೆಗಳು. " ಕಾಗೆ ಕೂರುವುದಕ್ಕೂ ರೆಂಬೆ ಮುರಿಯುವುದಕ್ಕೂ ಸರಿಯಾಯ್ತು" ಎಂಬಂತೆ ಮನುಷ್ಯ ಯಾವುದನ್ನೋ ಸಾಧಿಸಲೇ ಬೇಕೆಂದು ಹೋಗಿ ಸಾಧ್ಯವಾಗದಾಗ ಅದನ್ನು ಶಕುನಗಳಿಗೆ ಬಿಡುತ್ತಾನೆ. ಇನ್ನು ಕೆಲವೊಂದು ಬಾರಿ ತಪ್ಪೊಪ್ಪಿಕೊಳ್ಳಲು ಸಾಧ್ಯವಾಗದಾಗ ಶಕುನಗಳಿಗೆ ಬಿಡುವುದೂ ಹೌದು. ಒಂದು ಸಲ ಒಳ್ಳೆಯದಾದಾಗ ಆ ಸಮಯದ ಕೆಲವು ಘಟನೆಗಳು ಪುನರಾವರ್ತನೆ ಆಗುವುದರಿಂದ ಒಳ್ಳೆಯದಾಗುತ್ತದೆ ಎಂಬ ಮೂಢ ನಂಬಿಕೆಯೂ ಶಕುನಗಳಾಗಿ ಬದಲಾಗುತ್ತವೆ. 
ಇವಲ್ಲದೆ ಪ್ರಕೃತಿ ಮಾನವನಿಗಿಂತ ಶ್ರೇಷ್ಟ, ಪ್ರಾಣಿಗಳಿಗೆ ಮಾನವನಿಗಿಂತ ಜಾಸ್ತಿ ವಿವೇಕ ಇದೆ, ಅವುಗಳನ್ನು ಗೌರವಿಸಬೇಕೆಂಬ ದೃಷ್ಟಿಯಿಂದ ಪೂರ್ವಜರು ಕೆಲವನ್ನು ಹೇಳಿದ್ದಾರೆ. ಇಲ್ಲಿ ಹಿಂದೆ ಪ್ರಾಣಿಗಳಿಗೂ ಮಾತು ಬರುತ್ತಿತ್ತು ಎಂಬ ಅಜ್ಜಿ ಕಥೆ ನೆನಪಾಗುತ್ತದೆ.
ನೀವೂ ಹೇಳಿ ಶಕುನಗಳು  ನಿಮ್ಮ ಜೀವನದಲ್ಲಿ ಎಷ್ಟು ಮುಖ್ಯವಾಗಿವೆ ???

October 06, 2010

ಗೆಳೆಯಾ

ಗೆಳೆಯಾ....
ನಿನ್ನ ಗೆಳೆತನದ ಮೋಡಿ ಅದ್ಭುತ..
ಮರೆಯೋಣವೆಂದು ಬಯಸಿದರೂ ನೆನಪು ಜಾರಲೊಲ್ಲದು
ನಿನ್ನ ಸ್ನೇಹದ ಗಂಧವೂ ಮರೆಯಾಗಲೊಲ್ಲದು
ಏಕೆ ಅಂಥಾ ಮೋಡಿ ಮಾಡಿದೆ ನನ್ನಲಿ
ನಿನ್ನೊಡನೆ ಕಳೆದ ಕೆಲವೇ ದಿನಗಳು
ಜೀವನದುದ್ದಕ್ಕೂ ಬಾಡದ ಹಸಿರ ಮಾಲೆ
ನೀನು ಧೈರ್ಯ ತುಂಬಿದಾ ಕ್ಷಣ
ಜೀವನದ ದಿಕ್ಕು ಬದಲಾಯಿತಾಗ
ನಿನ್ನ ಗೆಳೆಯ ನಾನೆಂದು ನೀ ಒಪ್ಪಿಕೊಂಡ ಕ್ಷಣ
ಏನೋ ನಿಧಿ ಸಿಕ್ಕಂತಾಗಿತ್ತು
ಆದರೆ..........
ಇಂದೇಕೆ ಈ ಭಾವ
ನನ್ನ ನುಡಿಗಳಿಗೆ ಸ್ಪಂದಿಸದಿರುವ ಈ ಕಟು ಮೌನವೇಕೆ ಗೆಳೆಯಾ???

September 21, 2010

ಲೀನ

ಕೂಡು ಕಳೆಗಳ ಲೆಕ್ಕಾಚಾರ
ಅಸ್ತಿತ್ವಕ್ಕಾಗಿ ಹೆಣಗಾಟ
ನಾನು ತಾನೆಂಬೋ ಹೆಮ್ಮೆ
ನನಗೆ ತನ್ನದು ಎಂಬ ಸ್ವಾರ್ಥ
ಎಲ್ಲವೂ ನಾಲ್ಕು ದಿನಗಳ ಕಾಲ
ಕೊನೆಗೊಂದು ದಿನ ನನ್ನದೆಂಬುದು ಎನು ಉಳಿಯಿತು?
ಉಸಿರು ದೇವನ ಸ್ವತ್ತಾಯಿತು
ದೇಹ ಪಂಚಭೂತಗಳಲ್ಲಿ ಲೀನವಾಯಿತು

September 15, 2010

ಪೂರ್ಣ

ನಿನ್ನ ನೋಡಲೆಂಬ ಹಂಬಲದಿ
ನಾ ಕಾದಿದ್ದೆ ಹಲವು ದಿನ
ಪ್ರತಿ ಇರುಳೂ ನಿನ್ನದೇ ಧ್ಯಾನ
ಒಂದರೆಕ್ಷಣವಾದರೂ....
ಕಾಣ ಸಿಗುವೆಯೇನೋ ಎಂಬ
ಆಶಾಭಾವ

ಒಂದು ಪಾಕ್ಷಿಕದ
ವಿರಹದುರಿಯಿಂದ ಬೆಂದು
ಬಳಲಿ ಹೋದೆನು ಇನಿಯಾ
ನೀ ಬರುವ ಆ
ಅಮೃತ ಘಳಿಗೆಗೆ
ಜಾತಕ ಪಕ್ಷಿಯಾದೆ
ನಿನ್ನ ಸ್ವಾಗತಿಸಲು
ಮೈಯೆಲ್ಲಾ ಕಣ್ಣಾಗಿ ನಿಂದರೆ,
ಕಣ್ಣಾಮುಚ್ಚಾಲೆಯಾಡಿಸಿದೆ
ಕೊನೆಗೂ ನೋಡುವ ಕಾಲ ಕೊಡಿಬಂದಾಗ
ಅಯ್ಯೋ.....
ಚಂದಿರಾ,
       ನಿನ್ನನ್ನು ಮೋಡ ನುಂಗಿಯೇ ಬಿಟ್ಟಿತಲ್ಲಾ

August 25, 2010

ಹನಿ - ೨

ಹನಿ ನೀ ಚಿಪ್ಪೊಳಗೆ ಹುದುಗಿದರೆ ಮುತ್ತಾಗುವೆ
ಹನಿ ನೀ ಭೂಮಿಗೆ ಬಿದ್ದರೆ ಮಣ್ಣಾಗುವೆ
ಹನಿ ನೀ ಸಾಗರವ ಸೇರಿದರೆ ಅನಂತವಾಗುವೆ
ಹನಿ ನೀ ನನ್ನೋಳಗಿಳಿದರೆ ನೀ ನಾನಾಗುವೆ

August 17, 2010

ಮಳೆ

ಮಳೆ ಜೀವನದ ಏಕತಾನತೆಯನ್ನು ಹೊರದಬ್ಬುತ್ತದೆ.ಒಂದೊಮ್ಮೆ ಧೋ ಎಂದು ಸುರಿಯುತ್ತದೆ, ಮಗದೊಮ್ಮೆ ಶುಭ್ರ ನಿರಭ್ರ ಆಕಾಶ. ಹೊಸ ಮಳೆ ಬಿದ್ದಾಗಿನ ಮಣ್ಣಿನ ಸುವಾಸನೆ. ರಾತ್ರಿಯಲ್ಲೊಂದಿಷ್ಟು ಕಪ್ಪೆಗಳ ’ವಟರ್ ವಟರ್’ ನೊಂದಿಗೆ ಜೀರುಂಡೆಗಳ ಸಂಗೀತ. ಮನೆಯಲ್ಲಿ ಕುಳಿತು ಕುರುಕುಲು ತಿನ್ನುತ್ತಾ ಮಳೆಯ ವೈಭವ ನೋಡುವುದೇ ಸೊಗಸು.

ಮಳೆ ಸುರಿಯಬೇಕಾದರೆ ಮುಂಚಿನ ತಯಾರಿ, ಪ್ರಕೃತಿಯು ಗಾಳಿಯೊಂದಿಗೆ ಸೇರಿ ಮಳೆಯನ್ನು ಸ್ವಾಗತಿಸುವ ರೀತಿ ಇವುಗಳೊಂದಿಗೆ ಗುಡುಗು ಸಿಡಿಲುಗಳ ಅಬ್ಬರ. ಈ ರೀತಿ ಭರ್ಜರಿಯಾಗಿ ಭೇಟಿ ಕೊಡುವ ಮಳೆಯ ವರ್ಣಿಸಲು ಪದಗಳೇ ಸಾಲದು.

ಮಳೆ ಬಿಟ್ಟ ನಂತರದ ರಮ್ಯತೆ ಯನ್ನು ಸವಿಯುವುದು ಇನ್ನೂ ಸೊಗಸು. ಮಳೆ ನೀರ ಸಿಂಚನದಿಂದ ತೃಪ್ತಗೊಂಡ ಮರ ಗಿಡಗಳು,ಕಲ್ಮಶಗಳನ್ನು ತೊಳೆದುಕೊಂಡು ಸ್ವಚ್ಚಳಾಗಿ ನಿಂತ ಭೂತಾಯಿ, ತನ್ನೆಲ್ಲಾ ಧುಃಖಗಳನ್ನು ತೋಡಿಕೊಂಡು ಹಗುರಾದ ಆಕಾಶ - ಹೀಗೆ ಯಾರನ್ನೆಂದು ಬಣ್ಣಿಸಲಿ?

ಇದೆಲ್ಲಾ ಹಳ್ಳಿ ಮನೆಯಲ್ಲಿ ಮಳೆನೊಡಿದಾಗ ಅನಿಸಿದ್ದು..ಆದರೆ, ಮಳೆ ನೆಲಕ್ಕೆ ಬೀಳಲೇ ಅವಕಾಶವಿಲ್ಲದಂತೆ ಒತ್ತೊತ್ತಾಗಿ ನಿರ್ಮಿತವಾದ ಬೆಂಗಳೂರೆಂಬೋ ಕಾಂಕ್ರೀಟು ಕಾಡಿನಲ್ಲಿ ಭಾವನೆಗಳೇ ಕಳೆದುಹೋದಂತೆ ಮಳೆಯ ಸೊಲ್ಲಾದರು ಕೇಳಿಸುವುದೊ ಎಂದು ಮಗನೊಂದಿಗೆ ಕಿಟಕಿಯಿಂದ ಇಣುಕಿ ಹೊರನೋಡುವ ಭಾಗ್ಯವಷ್ಟೇ ಈಗ ಸಧ್ಯಕ್ಕೆ ಇರುವುದು.

August 16, 2010

ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು

ನಿಮಗೆಲ್ಲರಿಗೂ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು

ಕಳೆದ ಸುಮಾರು ೧೦ ವರ್ಷಗಳಿಂದ ಸ್ವಾತಂತ್ರ್ಯ ದಿನವೆಂಬುದು ಕೇವಲ ರಜೆಗೆ ಮಾತ್ರ ಸೀಮಿತವಾಗಿತ್ತು.ಇಂದು ನನ್ನ ಮಗನಿಂದಾಗಿ ಸ್ವಾತಂತ್ರ್ಯೋತ್ಸವದ ಆಚರಣೆಯನ್ನು ನೋಡುವಂತಾಯಿತು. ತ್ರಿವರ್ಣ ಧ್ವಜ ಆಗಸದಲ್ಲಿ ಹಾರುವುದನ್ನು, ವಂದೇ ಮಾತರಂ ನ ಘೋಷವನ್ನು ಕೇಳಿದೆ. ಎಲ್ಲಕ್ಕಿಂತ ಮುಖ್ಯವಾಗಿ 'ಜನ ಗಣ ಮನ' ವನ್ನು ಪೂರ್ತಿ ಮನಸ್ಸಿನಿಂದ ಹಾಡುವ ಅವಕಾಶವಾಯಿತು.

ಸಣ್ಣವಳಿದ್ದಾಗ ಶಾಲೆಯಲ್ಲಿ ಪ್ರತಿ ಆಚರಣೆಗಳು ಸಂಭ್ರಮ ತರುತ್ತಿದ್ದವು. ಸ್ಪರ್ಧೆಗಳಲ್ಲಿ ಭಾಗವಹಿಸುವುದು,   ಶಾಲಾ ಆಚರಣೆಗಳಲ್ಲಿ ಸಕ್ರಿಯವಾಗಿ ಇರುತಿದ್ದೆ. ಬೆಳೆದಂತೆಲ್ಲ ಎಲ್ಲಾ ಯಾಂತ್ರಿಕವಾಯಿತು. ಎಲ್ಲೋ ಕಳೆದು ಹೋಗುತ್ತಿರುವ ಭಯ. ಅದಕ್ಕಾಗಿ ಎಲ್ಲವನ್ನೂ ಬಿಟ್ಟು ಕೇವಲ ಮಗನ ಜೊತೆ ಇರುವ ಸಂತೋಷವನ್ನು ಪಡೆಯಲು ನಿರ್ಧರಿಸಿದೆ. ಈ ಬಿಡುವಿನಲ್ಲಿ ನನ್ನನ್ನು ಕಂಡುಕೊಳ್ಳುವ ಪ್ರಯತ್ನದಲ್ಲಿ ಬ್ಲಾಗಿಸಲು ಆರಂಭಿಸಿರುವೆ. 
ಜೀವನದ ಪ್ರತಿ ಕ್ಷಣವನ್ನು ಅನುಭವವಾಗಿ ದಾಖಲಿಸಲು ಪ್ರಯತ್ನಿಸುವೆ.

August 11, 2010

ಅದ್ವೆತ

ಕೃಷ್ಣನಾಗು ನೀ
ರಾಧಿಕೆಯಾಗುವೆ ನಾ

ಕೊಳಲಾಗು ನೀ
ನಾದವಾಗುವೆ ನಾ

ಶಕ್ತಿಯಾಗು ನೀ
ಶಕ್ತಿಕೇಂದ್ರವಾಗುವೆ ನಾ

ಪುರುಷನಾಗು ನೀ
ಪ್ರಕೃತಿಯಾಗುವೆ ನಾ

ಪ್ರೀತಿಯಾಗು ನೀ
ಧಾರೆಯಾಗುವೆ ನಾ

ನವಿಲ ಗರಿಯಾಗು ನೀ
ಅದರೊಳಗಣ ಬಣ್ಣವಾಗುವೆ ನಾ

ನೀನಾನಾಗು ಬಾ
ನಾ ನೀನಾಗುವೆ

August 05, 2010

ಬಾಂಧವ್ಯ

ನಿನ್ನ ಕೈಗಳ ಬಿಸುಪಿನ್ನೂ
ನನ್ನ ಅಂಗೈಲಿ ಬೆಚ್ಚಗಿದೆ

ನನ್ನ ಕಂಡಾಗ ನಿನ್ನ ಕಂಗಳಲ್ಲಿದ್ದ ಹೊಳಪಿನ್ನೂ
ನನ್ನ ಕಣ್ಣಲ್ಲಿ ಮಾಸಿಲ್ಲ

ನನಗೆ ಸ್ಪೂರ್ತಿಯಿತ್ತ ನಿನ್ನ ದನಿಯಿನ್ನೂ
ನನ್ನ ಕಿವಿಗಳಲ್ಲಿ ಜೀವಂತ

ನನ್ನೆಡೆಗೆ ಮಮತೆಯ ಸೆಲೆ ಹರಿಸಿದ
ನಿನ್ನ ಮನಸ್ಸು ಅಮೃತ

ಏನೆನ್ನಲಿ ಹೇಳು ಈ ಬಾಂಧವ್ಯಕೆ

August 03, 2010

ಹನಿ-೧

ಮಳೆಹನಿಯೊಂದು
ನನ್ನ ಬಳಿ ಬಂದಿದೆ
ಸಾಗರವ ಸೇರೆಂದರೆ
ಕೇಳಲೊಲ್ಲದಲ್ಲಾ

August 02, 2010

ಕಂಬನಿ

ನನ್ನೊಂಟಿತನದ ಸಂಗಾತಿಯಾಗಿ
ಬಾ

ಯಾರೂ ಇಲ್ಲದ ವೇಳೆ
ಧುಮ್ಮಿಕ್ಕಿ ಬಾ

ಮನದ ಬೇಗುದಿಯ
ಹೊರಹಾಕ ಬಾ

ದುಃಖದ ಉತ್ಪಾತವ
ಕೊನೆಗೊಳಿಸ ಬಾ

ಇನಿಯನ ವಿರಹ ವೇದನೆಯ
ಸೈರಿಸ ಬಾ

ಅಸದಳ ಸಂತೋಷವನ್ನೂ
ಬಣ್ಣಿಸ ಬಾ

ನಾಕು ಗೊಡೆಗಳೊಳಗೆ ಧುಮ್ಮಿಕ್ಕಿ
ಕಣ್ಣೀರೇ ಹರಿದು ಬಾ

August 01, 2010

ವೃಂದಾವನ

ಕೃಷ್ಣ ಸಾಮೀಪ್ಯ
ಮೌನ ಸಾಮ್ರಾಜ್ಯ
ಪ್ರೀತಿಯ ಲೋಕ
ಮಾಯೆಯ ಆಟ
ಆತ್ಮ ಪರಮಾತ್ಮಗಳ ಸಮ್ಮಿಲನ


         ನವನೀತ ಚೋರನ
         ಪುಟ್ಟ ಕಾಲ್ಗಳ ಗೆಜ್ಜೆ ನಾದನ
         ಯಶೋದಾ ಕೃಷ್ಣರ ಮುಗ್ಧ ಮಮತೆ
         ರಾಮ ಕೃಷ್ಣರ ತುಂಟಾಟ


ಯಮುನೆಯ ಜುಳುಜುಳು
ಕೊಳಲ ನಿರ್ಮಲ ದನಿ
ಗೋವುಗಳ ಅಂಬಾ ನಾದ
ನವಿಲುಗಳ ಸುಂದರ ನಾಟ್ಯ


        ಗೋಪ ಗೋಪಿಯರ ಸಂತಸ
        ಉದ್ಯಾನದ ಹಸಿರ ಸೊಬಗು
        ಬೆಳದಿಂಗಳಿರುಳ ರಾಸನೃತ್ಯ
        ರಾಧ ಕೃಷ್ಣರ ಅನುಪಮ ಪ್ರೇಮ